Ilang Tala para sa Araw ng Kalayaan ng Amerika, Hulyo 4, 2011

Artikulo

Ilang Tala para sa Araw ng Kalayaan ng Amerika, Hulyo 4, 2011

Nang mapanood ko ang "John Adams" sa HBO, sumagi sa aking gunita at wari'y nahabag ako at naikompara ang  naganap kina Felipe Agoncillo na nagtangkang katawanin ang Unang Republika sa Amerika noong 1899.

Inalipusta siya at di tinanggap ng Kongreso ng Amerika. Tulad ni Adams, kinatawan ni Felipe Agoncillo ang republika ni Aguinaldo sa Amerika sa panahong may digmaan sa pagitan ng Amerika at ng Pilipinas. Kaiba kay Adams na tinanggap sa Pransya,

Sina Teodor Agoncillo ay inupasala, hindi tinanggap at hindi kinalala ngKongreso ng Amerika. Sa kabila nang katotohanang sariling gatos ang lakad ni Agoncillo, hindi ito naging mabunga, Tanging ang Anti-Imperilalist League lamang sa Boston ang nakinig sa kanila.  Sa halip, nagdeklara pa ng gyera ang Kongreso at ginawang pormal ang gyera at sinakop pa ang Pilipinas sa loob ng 50 taon at magpahangang ngayon.

Samantalang si John Adams, dahil hindi marunong magsalita ng Pranses ay napag-iwanan ni Benjamin Franklin sa gawaing diplomatiko Sa Korte ng Pransya,tulad ni Agoncillo, siya ay dumanas ng mga pagkabigo at pag-upasala. Hindi lamang sa mga Pranses kundi sa mga Holandes . Ito ay nang magsikap siyang humingi ng suporta sa Amsterdam, Holandiya, Ni ayaw siyang pautangin dahil wala raw kakayahang magbayad ang Amerika.

Ang karanasang ito ay tumatak sa kamalayan ni Adams. Siya ang nagsabi na kailangang irespeto muna ang sarili bago irespeto ng iba. Ngunit napatunayan niyang umpisa lamang ito. Kailangan ka ring irespeto ng iba sa pamamagitan ng iyong sariling lakas.

Ganoon din ang nangyari kay Benjamin Franklin na matagal binuro ng mga Pranses bago binigyan ng pansin ng Hari ng Pransya. Kaiba lang kay John Adams, si Franklin ay lubhang pasensyoso at sanay sa buhay burges. nasanay na siya sa arte ng diplomasya. Ang arte ng matagal na paghihintay at tamang oportunidad. Hindi tulad ni Adams na laking bukid, may ugaling magsasaka na mainipin bagamat isang intelektwal.

Magkaiba sila ni Franklin o ni Thomas Jefferson na kapwa magaling magsalita ng Pranses. Direkta at mainipin si Adams. Kaya hindi siya makatagal sa diplomasya na ayon kay Franklin ay; “Ang arte ng nagpapakita ng maraming gawain habang  itinatago sa kakaunting resulta.”

Karanasang Pilipino 

Sa karanasan ng Pilipinas, sina Andres Bonifacio at Emilio Jacinto mismo ang nakapag-usap sa mga Hapon at nakakuha ng suporta ng Emperador laban sa Kastila at para sa rebolusyong Pilipino ng 1896. Sa katunayan, nagdeklara at nagbigay ng tulong ang Emperador ng Hapon. Dangan nga lamang ang unang byahe ng mga armas ay sinamang palad na lumubog. Ang iba pang armas ay naimbak sa Hapon at inabutan na ng rebolusyon.

Samantala sa Hongkong, sina Felipe Agoncillo, Mariano Ponce at Juan Luna ang nagsikap na kumalap ng malawak na suportang materyal at pinasyal para sa rebolusyon. Nagpatuloy ito laban sa digmaan laban sa Amerikano. Sa katunayan, nagpatuloy si Mariano Ponce na nagbase sa Hongkong at Japan sa pakikipagtalastasan sa mga Hapon kahit na nasakop ng mga Amerikano ang Pilipinas.

Sa katunayan, sa pakikipag-ugnayans a kaibigang si SunYat Sen, nailipat ni Mariano Ponce ang may 2,000 ripleng Kimura na hindi nailusot tungo sa Pilipinas para maitulong sa rebolusyong Tsino laban sa dinastiyang Manchu  noong 1911. Naipasok ang armas sa pamamagitan ng mga tauhan ni Sun Yat Sen at ginamit sa pag-aalsa sa Canton laban sa Emperador ng Manchu.

Lubos itong kinikilala ng mga Tsino maging ng Tagapangulong Mao nang lumaya ang Tsina noong 1949 bilang isang “ malaking tulong sa rebolusyong Tsino.”

Ito ang karanasan ng mga diplomata ng mga bagong tatag na republika o nang mga nakikipaglabang kilusan sa lahat ng panig ng mundo. Ito ay bahagi ng kanilang pagpapakilala sa kanilang rebolusyonaryong kilusan. Kaya nga dahil sa karanasang ito tumimo sa isip nian Adams maging kay Washington ang patakarang panlabas ng Amerika; “ Wala itong permanenteng kaibigan o kaaway, tanging permanenteng pambansang interes.”

Kaya sa  ikalawang pagtungo sa Kongreso sa paglolobby  ng JFAV, dala ang inspirasyon kina Adams ng Amerika at Agoncillo ng Pilipinas, dala namin ang determinasyong ipaglaban ang interes ng ating mga beterano at balo kahit waring papalimos ng awa at benepisyo para sa ating mga kababayan.

Isulong ang pakikibaka para sa hustisya at pagkakapantay-pantay!

*************